Müasir aeroport özündə bina, tikili və avadanlıqların mürəkkəb kompleksini birləşdirdiyindən, hava limanı sahiblərinin və hava hərəkəti idarəetmə orqanlarının mülki məsuliyyətinin sığortası bir çox risklərlə bağlıdır.

Hava limanı sahiblərinin və hava hərəkəti idarəetmə orqanlarıhava hərəkətinin idarə olunması, aviasiya məhsullarının çatdırılıması, hava gəmilərinin uçuşlarının təşkil edilməsi və bu uçuşlar üzrə xidmətin göstərilməsi, sərnişinlərin, baqajın, yükün və poçtun qəbul olunması və göndərilməsi zamanı aeroportun işçi heyətinin öz vəzifə borclarının yerinə yetirilməsi nəticəsində bədən xəsarətinin yetirilməsi, əmlaka ziyan vurulması kimi risklərlə üzləşə bilərlər. Bu risklər hava limanı sahiblərinin və hava hərəkəti idarəetmə orqanlarının mülki məsuliyyətinin sığortası altında təminata alına bilər.

Sığorta məbləğinin müəyyən edilməsi zamanı müvafiq aeroportda xidmət göstərilən ən baha olan hava gəmisinin dəyərinə və bir sıra digər parametrlərə əsaslanmaq olar.

Sığorta müqaviləsi ilə aşağıdakı istiqamətlər üzrə Sığortalının mülki məsuliyyəti sığortalana bilər (hamısı birlikdə və ya istənilən kombinasiyada):

1-ci istiqamət - sərnişinlərin qəbulu, onlara xidmət göstərilməsi və onların yola salınması, yüklərin, baqajıın və poçtun qəbulu, saxlanılması, yüklənməsi, boşaldılması və göndərilməsi. Aeroportun ərazisində və ya məsuliyyət zonasında vurulan ziyan üçün sərnişinlər və yük sahibləri qarşısında olan məsuliyyət sığortalanır;

2-ci istiqamət - hava gəmilərinin qəbulu, onlara xidmət göstərilməsi və onların yola salınması. Aeroportun ərazisində və ya məsuliyyət zonasında vurulan ziyan üçün məsuliyyət sığorta edilir;

3-cü istiqamət - hava gəmisinin bortunda və ya aeroportun ərazisində istifadə üçün istehlak mallarının çatdırılması. Keyfiyyətsiz məhsulun satılması (çatdırılması) ilə əlaqədar olaraq vurulan ziyan üçün aviadaşayıcılar və vətəndaşlar qarşısındakı məsuliyyət sığortalanır;

4-cü istiqamət - uçuş zamanı hava gəmisinə nəzarət edilməsi və hava hərəkətinin idarə edilməsi. Hava gəmisinin idarə edilməsindəki səhvlər nəticəsində hava gəmisinin qəzaya uğraması ilə əlaqədar olaraq vətəndaşların həyatı və sağlamlığına, vətəndaşların və hüquqi şəxslərin əmlakına vurulan ziyan üçün üçüncü şəxslər qarşısındakı məsuliyyət sığortalanır.